«Инвест-сәғәт»тәрҙең файҙаһы ҙур

Башҡортостан муниципалитетта-рында йыл башынан алып бөтәһе 1314 «Эшҡыуарлыҡ сәғәте» үткәрелгән, уларҙа 1,7 мең инвестиция проекты ҡаралған — был 2023 йылдың ғинуар-май айҙары менән сағыштырғанда 3 процентҡа күберәк. Улар 7,5 мең яңы эш урыны булдырыуҙы күҙ уңында тота. Инвестицияларҙың дөйөм күләме 70 миллиард һум тәшкил итә. Инвесторҙар менән үҙ-ара эш итеү форматы «Бәләкәй һәм урта эшҡыуарлыҡ башланғысына ярҙам» милли проекты сиктәрендә тормошҡа ашырыла.
Беҙҙең район был йүнәлештә  әүҙем эшләй. Әбйәлилдә «Бәләкәй һәм урта эшҡыуарлыҡ субъекттарын үҫтереү» муниципаль программаһы уңышлы тормошҡа ашырыла. 

— Һуңғы дүрт йылда маҡсатлы программа сиктәрендә 42 бәләкәй һәм урта эшҡыуарлыҡ субъекты ярҙамы алды. 2023 йылда 9 бәләкәй һәм урта эшҡыуарлыҡ субъекттарына 3,5 миллион һумлыҡ субсидия бирелде. Тағы ла төбәк һәм федераль кимәлдәге проекттар — ауыл хужалығында эш башлаусыларға «Агростартап»тар, туризмды үҫтереү буйынса, йәш эшҡыуарҙарға тәғәйенләнгән һәм башҡа программалар тормошҡа ашырыла, — ти район хакимиәте башлығының эшҡыуарлыҡ һәм инвестициялар буйынса урынбаҫары Артур Дәүләтбаев. — Эшҡыуарҙар һәм бизнеста көсөн һынап ҡарарға теләүселәр үҙҙәренең проекттары менән таныштыра, финанс һәм башҡа төрлө ярҙам саралары менән ҡыҙыҡһына. 
Район эшҡыуарҙары төрлө бизнес-проекттар яҡлай. Айырыуса йәштәрҙең был өлкәгә ышаныслы килеүе ҡыуаныслы.
— Уҙған йылда «Инвест сәғәт» форматында 52 кәңәшмә үткәрелде, уларҙа 65 бизнес-проект тикшерелде. Ауыл хужалығы тармағын үҫтереүгә 18 проект тәҡдим ителде, төҙөлөштә — 10, етештереү өлкәһендә 6 һәм халыҡҡа көнкүреш хеҙмәте күрһәтеү буйынса 15 проект ҡаралды. Туризм йүнәлеше әүҙем үҫешә, 16 бизнес-идея булды, улар араһында ҡыҙыҡлы проекттар күп, — ти Артур Раил улы. — Йыл башынан үткәрелгән «Эшҡыуарлыҡ сәғәте»ндә утыҙға яҡын бизнес-проект тикшерҙек. 
Уңышлы яҡлап, эштәрен башлай алғандар күп. Мәҫәлән, Әнисә Әхтәмова Асҡар ауылында икмәкхана асыу буйынса бизнес-проект менән мөрәжәғәт итте. Район етәкселеге уға бәләкәй һәм урта эшҡыуарлыҡ субъекттарын үҫтереү муниципаль программаһында ҡатнашырға тәҡдим итә. Уның ярҙамы менән икмәкхана өсөн ҡорамалдар һатып алыу сығымдарының бер өлөшө ҡапланған. Ҡыҫҡа ғына ваҡыт эсендә Әнисә Әхтәмова район үҙәгенең Көнсығыш-1 биҫтәһендә «Сәк-сәк» икмәкханаһын асып, продукция етештереүҙе һәм һатыуҙы яйға һалды. БР Төбәк лизинг компанияһынан ике аҙ тонналы йөк автомобиле һатып алыуға финанс ярҙам арҡаһында эшҡыуар яҡын-тирәләге ауылдарға һәм күрше райондарға ла яңы бешерелгән икмәк һәм кондитер ризыҡтары тарата. Хәҙер Әнисә Әхтәмованың штатында 10 хеҙмәткәр эшләй. Район үҙәге халҡын йылы икмәк, тәмле кондитер ризыҡтары менән тәьмин иткән, юлаусыларға яңы бешкән тәмлекәстәр менән сәй эсеү урыны асҡан эшҡыуар  ассортиментты тағы ла төрләндерергә ниәтләй. 
Динара САФИУЛЛИНА.