Башҡортостан сәнәғәте ышаныслы үҫеш темптарын күрһәтә

Статистика мәғлүмәттәренә ярашлы, 2026 йылдың ғинуар-июнь айҙарында республикала етештереү күләме былтырғы ошо уҡ осор менән сағыштырғанда 6,7 процентҡа артҡан.
Айырыуса июнь айындағы күрһәткестәр һөйөнөслө: май менән сағыштырғанда етештереү 2 процентҡа, ә 2025 йылдың июненә ҡарата хатта 12,4 процентҡа күтәрелгән. Был үҫешкә төп этәргесте эшкәртеү сәнәғәте бирә — бында ярты йыллыҡ күрһәткес 10,3 процентҡа, ә июнь айындағы үҫеш 17,3 процентҡа еткән.
Шул уҡ ваҡытта иҡтисадтың башҡа тармаҡтарында хәлдәр төрлөсә. Мәҫәлән, файҙалы ҡаҙылмалар сығарыу өлкәһендә ярты йыллыҡ һөҙөмтәләр 5,1 процентҡа кәмеүен күрһәтә. Электр энергияһы, газ һәм пар менән тәьмин итеү секторында ла оҡшаш хәл: бында ла етештереү күләме бер аҙ түбәнәйгән.
Әммә һыу менән тәьмин итеү һәм ҡалдыҡтарҙы утилләштереү өлкәһендә ыңғай үҙгәрештәр бар. Йыл башынан күрһәткестәр кәмеһә лә, июнь айында был тармаҡта һиҙелерлек алға китеш теркәлгән: май менән сағыштырғанда — 10,2 процентҡа, ә былтырғы июнь менән сағыштырғанда 13,6 процентҡа юғарыраҡ.
Дөйөм алғанда, Башҡортостандың сәнәғәт күрһәткестәре ил кимәлендәге уртаса үҫеш темптарынан күпкә юғары. Сағыштырыу өсөн: Рәсәй буйынса беренсе ярты йыллыҡта сәнәғәт етештереүе ни бары 0,4 процентҡа ғына артҡан. Был республикабыҙҙың иҡтисади потенциалының көслө булыуын һәм сәнәғәт предприятиеларының һөҙөмтәле эшләй алыуын раҫлай.