Яңынан-яңы үрҙәргә ынтылыусы уҡыусылар

Башҡорт телен һаҡлау Һәм үҫтереү фонды гранттарына конкурстар башҡорт телен ихлас яратҡан кешеләрҙең ижади һәм заманса идеяларын тормошҡа ашырырға мөмкинлек бирә. Был юҫыҡта республикала күп конкурстар һәм олимпиадалар үткәрелеп килә. 

2023-2024 уҡыу йылында  башҡорт теле һәм әҙәбиәтенән Федераль төньяҡ-көнсығыш олимпиадаһына  һайлап алыу этабында йәмғеһе 860 уҡыусы ҡатнашһа, 363  уҡыусы икенсе этапта ҡатнашыу хоҡуғына лайыҡ булды.

Был сара — башҡорт теленең ил кимәлендә тантана итеүе. Иң-иң көслөләр иҫәбендә республикабыҙҙың иң ҡеүәтле университетына бүләкләү тантанаһына саҡырылыу балалар өсөн — үҙе ҙур мәртәбә. Егәрлелек, тырышлыҡ һөҙөмтәһе, башҡорт телен үҫтереүгә индергән өлөштәренең күрһәткесе.

Еңеүсе һәм призерҙар исемлегенә Таһир  Кусимов исемендәге Асҡар гимназияһынан Азалия Ғәлиуллина(9 кл.), Физәлиә Ғәбитова(9 кл.),  Хәмит урта мәктәбенән Яҙгөл Абдуллина(9 кл.) инделәр, гимназия уҡыусыһы Илһамова Наҙгөл (9 кл.) «Маҡсатҡа ынтылыш» номинацияһында еңеүсе итеп табылды.

Быйылғы уҡыу йылында Азалия Ғәлиулина “Башҡорт теле һәм әҙәбиәтенән төбәк-ара олимпиада” еңеүсеһе лә. Әлеге ваҡытта Башҡортостан Республикаһының мәғариф һәм фән министрлығы тарафынан ойошторолған  “Йәйләү” лагерынада ял итә.

 Еңеүсе ҡыҙҙарыбыҙҙы уңыштары менән ихлас ҡотлайбыҙ! Киләсәктә лә яңынан-яңы үрҙәр яулауҙарын теләйбеҙ! Уларҙы әҙерләүсе башҡорт теле һәм әҙәбиәте уҡытыусылары Альбина Ринат ҡыҙы Муллахмәтова һәм Илһөйәр Рифғәт ҡыҙы Абдуллинаға йәш быуынды рухлы, илһөйәр һәм телһөйәр итеп үҫтереүҙә тос өлөш индергәндәре өсөн Рәхмәт хаттары менән бүләкләнде.

 - Был олимпиада Рәсәй кимәлендә 45 тел буйынса үткәрелә. Туған телебеҙҙе һаҡлау, үҫтереү өсөн республикала күп эштәр башҡарыла. Ошо уҡ олимпиада ла   беҙҙең гимназиянан Светлана Килмөхәмәтова, Алһыу Рәхимова үткән уҡыу йылдарында еңеүселәр булдылар. Олимпиадалар өсөн уҡыусыларға премиялар бирелә, - тип һөйләй Альбина Муллахмәтова.