Балалар хәрәкәте - шәхес формалашыу сараһы

Оҫталыҡ дәрестәре

Әүҙем, маҡсатҡа ынтылышлы балалар ҡунаҡтарҙы сараның тәүге минуттарынан үк ысын патриоттар донъяһына алып инде. Гимназия фойеһында ҡатнашыусыларҙың иғтибары оҫталыҡ дәрестәренә йүнәлтелде. Ике йыл рәттән 3D-ручка технологиялары менән шөғөлләнгән уҡыусыларҙың эштәре айырыуса иғтибарҙы йәлеп итте. Һәр кем уникаль изделиелар эшләү өсөн 3D-ручка ҡулланып, үҙен ижадсы-тикшеренеүсе ролендә һынап ҡарай алды. М. Р. Хәкимова, Ф. Р. Ғарипова етәкләгән кластан тыш дәрестәрҙә шөғөлләнгән уҡыусылар төрлө кимәлдә призлы урындарға лайыҡ булғандар. Дәрестән тыш эшмәкәрлек буйынса методик әсбаптар, альбомдар һәм материалдарҙан бай күргәҙмә ойошторолған.

Шулай уҡ Бөйөк Еңеүҙең 80 йыллығына арналған квест-уйын уҙҙы. 2 «в» класында уҡыған «Рәсәй бөркөттәре» (Ә. Х. Әминева)  ҡунаҡтарға хәрби һөнәрҙәргә һәм герой-ҡалаларға арналған станциялар буйлап квест-уйын үтергә тәҡдим итте. Ҡатнашыусылар Бөйөк Ватан һуғышы тарихын иҫкә төшөрҙө. 

 Илһөйәрлек рухы нығый

Семинарҙың рәсми өлөшөн 80 уҡыусынан торған хор асты. Хорҙа кадет кластары уҡыусылары, юнармейсылар, шайморатовсылар, «Рәсәй бөркөттәре» балалар ойошмаһы ағзалары Рәсәй Федерацияһының, Башҡортостандың гимнын башҡарыуы күңелдәргә үтеп инде. Уҡыусыларҙың ғорурлыҡ менән гимн башҡарыуы киләсәккә яҡты өмөттәр уятты.

Семинарҙа ҡатнашыусыларҙы гимназия директоры Р. Н. Әхмәтов һәм мәғариф бүлеге начальнигы В. С. Абсаҙыева сәләмләне. Артабан кадеттар, юнармеецтар, бала саҡ навигаторҙары, йәш янғын һүндереүселәр дружинаһы, МЧС, «Рәсәй бөркөттәре», «Бала саҡ навигаторҙары», ЮИД кластарының парады үтте. Юнармеецтар тантаналы рәүештә Ватанға тоғролоҡҡа ант бирҙе.

Артабан ҡунаҡтарға дәрестән тыш сараларҙы ҡарарға тәҡдим ителде. Ғәҙәттән тыш хәлдәр министрлығы йүнәлеше буйынса шөғөлләнгән кадеттар командаларҙың аныҡ үтәлеше менән хайран ҡалдырҙы. Башланғыс хәрби әҙерлек дәресендә (НВП) Т. Р. Фәттәхов автомат һәм хәрби снарядтар менән эш итеү ҡағиҙәләрен аңлатты. Теоретик өлөшөнән һуң уҡыусылар атыу буйынса электрон тирҙа сәпкә тейҙереү оҫталығын күрһәтте, шул иҫәптән саҡырылған уҡытыусылар ҙа автоматтан атып ҡараны. Дәрестә атыу әҙерлеге заманса тренажер ярҙамында үтә, был реаль ҡорал һәм боеприпастар ҡулланмай хәрби таҫыллыҡты үҫтереү мөмкинлеген бирә.

Шайморатов мәктәбенең 6-сы класында (Камалова Д. Ю.) төрлө республика конкурстарында ҡатнашып, еңеүҙәр яулаған мәргән уҡсы Лена Йәһүҙина милли спорт төрө — уҡтан атыу хаҡында һөйләне. Уҡыусылар уҡ, һаҙаҡ менән яҡындан танышты, сәпкә атып ҡараны. Үҫеп килгән «Рәсәй бөркөттәре» класы уҡыусылары (Й. Р. Хисаметдинова, З. Р. Амурзина) ғорурлыҡ менән командала эшләү һәләттәрен күрһәтте. Башланғыс класта булыуға ҡарамаҫтан бөркөттәрҙә дуҫлыҡ, коллективизм, бер-береңә ярҙам итеү, килешеп эшләү һымаҡ сифаттар үҫешкән.

«Янғын һүндереүселәр мәктәбе» ағзалары (И. Р. Шарипова) үҙҙәренең белеме менән алдырһа, театр сәнғәте түңәрәгендәгеләр (И. Р. Шәйәхмәтова) актерлыҡ оҫталығын иҫбатланы. Унда балалар Ф. Аҡбулатованың «Дуҫлыҡ ҡәҙере» спектакленән өҙөк күрһәтте, тамашасыға дуҫлыҡ ҡәҙере, партриотизм, илһөйәрлек тойғоларын еткерә алдылар.

Кадет кластары (С. С. Әбделмәнов) сафта командалар үтәү оҫталығы менән бүлеште киләсәктә әрме сафтарын үтәсәк егеттәргә мәктәптә алған тәжрибә тик тыныс маҡсаттарҙа ғына кәрәк булһын ине. Рәсәй Геройы Тамерлан Илһамов исемендәге уҡыу кабинетында «Геройҙар беҙҙең хәтерҙә йәшәй...» темаһына һөйләшеү булды. Юнармиясылар ошо класта уҡыған Тамерландың бала сағын, батырҙың хәрби хеҙмәт юлын, батырлығын өйрәнгән. Үҙҙәренең Геройы тураһында ғорурлыҡ хисе менән бәйән иттеләр, Герой партаһына, Тамерлан тураһында мәғлүмәт туплаған таҡтаға бик һаҡсыл мөнәсәбәттә улар. Юнармия отряды етәксеһе Р. С. Мөхәмәтдинова Тамерлан Илһамовтың кабинетын булдырыуға күп көс һалған. Дәрестә Геройҙың апайы Әлиә Фәтхетдинова ҡатнашты, ул ҡустыһы тураһында яҡты иҫтәлектәре менән уртаҡлашты.

2020 йылда Башҡортостан Башлығы Радий Хәбиров тәҡдиме менән республикала тәүге шайморатовсылар кластары булдырылды, 2022 йылда райондан беренсе булып гимназия уҡыусылары Өфөлә М. Шайморатов һәйкәле алдында тантаналы ант бирҙе. Шайморатовсылар бөгөн 7-се класта уҡый, ярайһы уҡ тәжрибә туплаған, тиҫтерҙәренә һәр яҡлап өлгө булырлыҡ уҡыусылар төрлө кимәлдә уңыштарға өлгәшә. Тәжрибәһе тураһында шайморатовсылар үҙҙәре һөйләне, дәресте алып барҙы, ә етәкселәре – Башҡортостандың атҡаҙанған уҡытыусыһы А. Р. Муллахмәтова тик йүнәлеш кенә биреп торҙо. 6-сы класта тағы ла бер шайморатовсылар класы үҫеп килә (Д. Ю. Камалова). Көслө рухлы ла, илһөйәр ҙә киләсәгебеҙ тип ышанғы килә.

ЮИД отряды (Р. Н. Рәхмәтова) юл ҡағиҙәләренә өйрәтһә, йәш янғын һүндереүселәр дружинаһы (З. В. Фәттәхова) үҙ белемдәре менән һоҡландырҙы. Полиция класы кураторы Ф. М. Нафиков, класс етәксеһе А. Х. Ғәлина һөнәри йүнәлеш биреү эшен бойомға ашырыу өҫтөндә даими эш алып бара, уҡыусылар ҡуйылған маҡсатҡа ирешергә ынтыла.

Белем биреү учреждениелары етәкселәре Советтар Союзы Геройы Т. Кусимов исемендәге кабинетта түңәрәк өҫтәл артында тәжрибә уртаҡлашты. Уҡыу кабинеты техник әсбаптар менән йыһазландырылған. Бай йөкмәткеле музей-кабинет дәрестәр, кластан тыш патриотик саралар үткәреү өсөн кәрәкле база.

 Берҙәмлектә - көс

Семинар сиктәрендә уҙғарылған һәр сара патриотизм рухы менән һуғарылған. Һәр мөйөш Бөйөк Ватан һуғышы һәм махсус хәрби операция геройҙарының батырлығын иҫкә төшөрә. Күңелгә үтеп инерлек тыныслыҡ һәм тыуған илгә һөйөү тураһында хәрби йырҙар, шулай уҡ уҡыусыларҙың дәртле бейеүҙәре сараға байрам биҙәге өҫтәне. Семинарҙың пленар өлөшөндә ҡатнашыусылар балалар хәрәкәттәрен үҫтереүҙең көнүҙәклеге һәм төрлө майҙансыҡтарҙа балаларҙы һәм үҫмерҙәрҙе патриотик тәрбиәләү мөмкинлектәре тураһында докладтар тыңланы. Семинарҙың модераторы – тәрбиәүи эштәр буйынса директор урынбаҫары Фәнилә Нөғәмәнованың етәкселегендә ошо бер-нисә сәғәт эсендә гимназия коллективының күп йүнәлештә патриотик тәрбиә биреү маҡсатын берлектә башҡарыуы күренде.

Балалар хәрәкәтенең үҫеше – йәш быуындың шәхес тәрбәләү ысулы, патриотизм һәм әүҙем гражданлыҡ позицияһын формалаштырыу өсөн ҡеүәтле ҡорал булыуын гимназия коллективы сағыу иҫбатланы. 

Гөлнара ҒИНИӘТОВА.