Республика буйынса берҙәм дәүләт имтихандары һөҙөмтәләре билдәле

Быйыл иң популяр предмет-профилле математика - уны 9 191 кеше, йәғни БДИ-ла ҡатнашыусыларҙың 55,2 проценты тапшырған. Йәмғиәтте өйрәнеү буйынса имтиханға 5 702 кеше (34,2 процент) теркәлгән. Шулай уҡ төбәк уҡыусылары информатика, биология, физика һәм химия фәндәрен күберәк һайлаған. Берҙәм дәүләт имтиханы һөҙөмтәләренә килгәндә, уҙған йыл менән сағыштырғанда республикала химия, тарих, инглиз һәм немец телдәре буйынса уртаса балл һиҙелерлек үҫкән. Йөҙ баллы һөҙөмтәләр һаны 159-ға тиклем етә, 2024 йылда улар 155 булған. Химия һәм информатика буйынса йөҙ балл алыусылар һаны күпкә артҡан. Шулай уҡ ваҡытта республикала тәүге тапҡыр 300 баллсы бар. Өфө ҡалаһының 153 – сө лицейы уҡыусыһы Алексей Лобов - өс предмет буйынса юғары һөҙөмтә алған. Химия, тарих һәм инглиз теле буйынса имтиханда 80 – дән ашыу балл алғандар күберәк. Республика буйынса БДИ-ны уртаса 60 балдан ашыу тапшырыусылар һаны  артҡан.

Белеүебеҙсә, Башҡортостанда берҙәм дәүләт имтиханын иң юғары балға тапшырған уҡыусылар һәм уларҙы әҙерләгән уҡытыусылар өсөн ярҙам саралары ғәмәлдә.

Улар 50 мең һум күләмендә премия алалар. Йөҙ балға тапшырған уҡыусылар Евразия фәнни – белем биреү үҙәге составына ингән Башҡортостан вуздарына уҡырға инһәләр, 150 мең һум күләмендә түләүгә хоҡуҡлы.