Әбйәлилдә ҡыпсаҡтар күп түгел. Хәлил ауыл биләмәһенә ҡараған ауылдар ҡарағай-ҡыпсаҡ ырыуына ҡарай. Йыйынға ауыл биләмәһе башлығы – ҡор башы Айбулат Хәйбуллин етәкселегендә мәҙәниәт хеҙмәткәрҙәре Нәйлә Дәүләтова, Таңатар Шәмсетдинов һәм район мәҙәниәт бүлеге начальнигы Фәнил Әсәҙуллин барып ҡайтты.
– Йыйын үҙенең эсенә бай программа алғайны. Сараның пленар ултырышы Тәүәкән күп функциялы мәҙәниәт йортонда үтте. Ҡыпсаҡ ырыуы, уның тарихы, бөгөнгөһө, билдәле кешеләре һәм башҡалар хаҡында бай йөкмәткеле докладтар тәҡдим ителде. Бөтә донъя башҡорттары ҡоролтайы башҡарма комитеты ағзаһы, Өфө фән һәм технологиялар университеты доценты, филология фәндәре кандидаты Искәндәр Сәйетбатталовтың, Бөтә донъя башҡорттары ҡоролтайының башҡорт халҡы тарихы һәм үҫеше мәсьәләләре буйынса комиссияһы координаторы, Өфө фән һәм технологиялар университеты доценты, тарих фәндәре кандидаты Нурислам Ҡалмантаевтың, Рәсәй Фәндәр академияһы Өфө федераль тикшеренеүҙәр үҙәгендәге Тарих, тел һәм әҙәбиәт институтының көнсығыш ҡулъяҙмалары бүлеге мөдире, тарих фәндәре кандидаты Әхәт Сәлиховтың “Халҡыбыҙҙың мәҙәниәтендә иҫке башҡорт теле”, “Ҡыпсаҡ ырыуының арҙаҡлы улы Мортаза Ғөбәйҙулла улы Рәхимов”, “Ҡыпсаҡтарҙың башҡорт тарихындағы урыны” темаларына сығыштары данлы ырыуҙы төрлө яҡлап сағылдырҙы, – тип һөйләй А. Б. Хәйбуллин.
Артабан һүҙ ҡыпсаҡ ырыуы вәкилдәренә бирелгән. Бөтә донъя башҡорттары ҡоролтайы Башҡарма комитеты ағзаһы, Ырымбур өлкәһе башҡорттары ҡоролтайы етәксеһе Йәғәфәр Яманһарин – “Ырымбур өлкәһендәге ҡыпсаҡ ырыуы башҡорттарына ҡағылышлы мәсьәләләр”; Башҡортостандың дәүләт һәм йәмәғәт эшмәкәре Әхмәҙулла Бейешевтең ейәне, Ырымбур өлкәһе Быҙаулыҡ ҡалаһының ветерандар советы рәйесе урынбаҫары Юрий Бейешев – “Дәүләт һәм йәмәғәт эшмәкәре Әхмәҙулла Әхмәтшамил улы Бейешевтең исемен мәңгеләштереү”; Күгәрсен тарих-тыуған яҡты өйрәнеү музейы директоры, Күгәрсен районы башҡорттары ҡоролтайы рәйесе Рөстәм Сәйетбатталов – “Күгәрсен районының ҡыпсаҡ ауылдары: хәҙерге торошо, үҫеш мөмкинлектәре”; Бөрйән районынан тыуған яҡты өйрәнеүсе Мөнир Фәйзуллин – “Беҙ – ҡарағай-ҡыпсаҡтар: кем беҙ, ниндәй беҙ?”; Ырымбур өлкәһенән тыуған яҡты өйрәнеүсе Радик Ырыҫҡолов – “Ырымбур өлкәһенең дәүләт архивында ҡыпсаҡ ырыуы башҡорттары буйынса сығанаҡтар”; Башҡортостан Милли музейы филиалы – Баймаҡ районының Темәс тарих һәм тыуған яҡты өйрәнеү музейы мөдире Айҙар Мәжитов – “Беҙ – ҡарағай-ҡыпсаҡ нәҫеленән”; Көйөргәҙе районынан яҙыусы, хеҙмәт ветераны Азат Хәлилов – “Көйөргәҙе районы ҡыпсаҡтары: тарихы һәм хәҙергеһе” тигән темалар буйынса сығыштарында киң мәғлүмәт бирҙе.
Пленар ултырышта Ҡыпсаҡ ырыуының ҡор башы һайланды. Был оло бурыс тарих фәндәре кандидаты Әхәт Сәлиховҡа йөкмәтелде.
Йыйында ҡор башы һайлауҙан тыш, ҡыпсаҡтарҙың гимны һәм гербы варианттары ҡаралды. Улар тауыш биреүгә ҡуйылды һәм уның һөҙөмтәләре буйынса раҫланасаҡ.
Г. ФӘТХУЛЛИНА.