— Беҙҙең республикала ауылдарҙа 1,5 миллион кеше йәшәй. Улар Башҡортостан үҫешенә үҙ өлөшөн индерә, төбәктең иҡтисади таянысы булып тора. Һәм, әлбиттә, беҙҙең йолалар һәм мәҙә-ниәтте һаҡлауҙа төп көс, — тип белдерҙе Радий Фәрит улы.
Ошо йылдарҙа федераль бюджеттан 3,8 миллиард һум, шул иҫәптән «Мәҙәниәт» милли проекты сиктәрендә 1,5 миллиард һум аҡса һалынған. Бындай ярҙам арҡаһында мәҙәниәт учреждениеларын төҙөү һәм ремонтлау, уларҙы йыһазландырыу, тармаҡты һанлаштырыу йәһәтенән күп эштәр башҡарылған.
Республикала һуңғы биш йылда 94 мәҙәниәт объекты төҙөлгән һәм ремонтланған, 344 мәҙәниәт учреждениеһы заманса ҡорамалдар менән йыһазландырылған. 16 модель китапханаһы, 11 виртуаль концерт залы сафҡа индерелгән, гастролдәргә йөрөү өсөн 90 транспорт берәмеге, 10 автоклуб һатып алынған.
Программа шарттарына ярашлы, мәҙәниәт өлкәһендә профилле һөнәри белемле 35 йәшкә тиклемге йәш белгестәргә ярҙам күрһәтеләсәк. 2018 йылдан ауылға йәки 50 меңгә тиклем кеше йәшәгән ҡалаға эшкә килгән мәҙәни-ял итеү учреждениелары, китапханалар, музейҙар, мәҙәниәт өлкәһендә өҫтәмә белем биреү өлкәһе хеҙмәткәрҙәре программала ҡатнашыуға дәғүә итә ала.
Беҙҙең районда был ярҙам сараһын йәш белгестәр — балалар сәнғәт мәктәбе уҡытыусылары Әлфиә Вәлитова һәм Руслан Куприянов, Дәүләт мәҙәниәт йорто режиссеры Рузил Шәмсетдинов алды. Улар барыһы ла 500 мең һум аҡсаны торлаҡ шарттарын яҡшыртыуға тотонған.
— Ауылға эшкә ҡайтҡаныма һис үкенмәйем. Асҡар балалар сәнғәт мәктәбендә бәләкәйҙән шөғөлләнгәс, барыһы ла яҡшы таныш, яҡын. Мәктәп коллективы менән тиҙ арала уртаҡ тел таптым. Директор Гүзәл Нияҙғолованың һәр башланғысымды хуплап тороуы ҡолас йәйеп эшләргә ынтылыш бирә. Балаларҙы яратам, улар менән дәрестә ваҡыт үткәне лә һиҙелмәй, — ти педагог-рәссам Әлфиә Дамир ҡыҙы. — Ауылға эшкә ҡайтҡан мәҙәниәт хеҙмәткәрҙәренә ярҙам йөҙөнән булдырылған программала ҡатнашып, 500 мең һум алыуым бик ҡыуаныслы булды. Мәҙәниәт өлкәһендә эш башлаусы йәштәргә шундай ярҙам сараһын булдырған республика етәкселегенә рәхмәт. Хәҙер башкөллө уҡыусыларымды үҙ ҡулдары менән матурлыҡ тыуҙырырға өйрәтәм, яңы алымдар, материалдар бик күп, рәхәтләнеп ижад итергә мөмкин. Тағы бер хыялым — Көнсығыш-2 биҫтәһендә төҙөлгән мәктәптә биҙәү-ҡулланма сәнғәте буйынса класс асыу.
Динара САФИУЛЛИНА.