Инновацион медицина технологияларын индереү

Республиканың Генлы дерматоздар үҙәге командаһы тиренең генетик сирҙәрен дауалауҙа яңы осорға әҙерләнә.

Тиренең һирәк осрай торған генетик сирҙәренән яфаланған пациенттарға ярҙам итеүсе “Күбәләк-балалар” хәйриә фонды эксперттары Өфөлә “Тиренең орфан сирҙәренә дусар пациенттарҙы диагностикалау, дауалау һәм оҙата барыуҙа иннвацион ысулдар” тип аталған күсмә конференция үткәрҙе. Сара быйыл Генлы дерматоздар үҙәге асылған Республика тире-венерологик диспансер базаһында үтте. 

Республикала 19 кеше буллезлы эпидермолиз һәм 24 кеше ихтиоз сиренә дусар. Башҡортостанда бөтәһе 43 меңдән ашыу ауырыу тиренең генетик һәм ауыр хроник сирҙәренән яфалана.

Практика өлөшөндә табиптар зарарланған тирене дауалауҙа ҡулланылған, үҙебеҙҙә етештерелгән бәйләү материалдары – үҙенсәлекле селтәр бәйләүестәре менән танышты. Яңы таргет терапияһы препараттарын яраларға һөртөү техникаһы буйынса практикум үткәрелде. Рәсәйҙең 23 төбәгенән тәүге 47 пациент инновацион дауаны 2025 йылдың  тәүге яртыһында аласаҡ.