Пилотһыҙ осоу аппараттары буйынса махсус кластар булдырыласаҡ

Үткән йылда Башҡортостанға, “Пилотһыҙ авиация системалары” милли проекты сараларына ярашлы, пилотһыҙ осоу аппараттары буйынса махсус кластар булдырыуға 333 миллион һум аҡса бүленгән. Был аҡсаға мәктәптәрҙә һәм бер колледжда 20 класс асылып, йыһазландырылған.

– Республика был федераль проект беренсе тапҡыр тормошҡа ашырылған 30 пилот субъекты иҫәбенә инде. Милли проектта ҡатнашыу тармаҡты бер юлы бер нисә йүнәлештә үҫтерергә мөмкинлек бирә. Беренсенән, республикала пилотһыҙ осоу аппараттарын етештереү эҙмә-эҙлекле үҫешә – былтыр төрлө типтағы дүрт меңдән ашыу пилотһыҙ осоу аппараты эшләнде. Икенсенән, пилотһыҙ авиация системалары өсөн кадрҙар әҙерләнә – 2030 йылға тиклем йыл һайын 2000-шәр кеше уҡытыласаҡ. Әлеге ваҡытта республикала ете юғары һәм урта профессиональ белем биреү программаһы буйынса белем биреү алып барыла ла инде, – тип хәбәр итте республика Хөкүмәте Премьер-министры Андрей Назаров.

Шулай уҡ Башҡортостанда пилотһыҙ авиация системалары буйынса ғилми-етештереү үҙәге барлыҡҡа килә. Үҙәк эшмәкәрлеге өсөн “Первушино” аэродромының осоу инфраструктураһын файҙаланыу планлаштырыла. Ғилми-етештереү үҙәгенең лабораториялары “РВ-1” радиоэлектроника технопаркы майҙандарында урынлаштырыла. Ғилми-етештереү үҙәге резиденттары һәм радиоэлектрон технопарк өсөн яңы пилотһыҙ авиация системалары төрҙәрен һәм уларҙың комплект өлөштәрен күпләп етештереүҙе ойоштороуға дәүләт ярҙамы ҡаралған.

2030 йылға Башҡортостанда пилотһыҙ осоу аппараттары өсөн ун ултырыу майҙансығы барлыҡҡа килергә тейеш.

Сығанаҡ: Башҡортостан гәзите.