"Хәтер баҡсаһы" акцияһында ҡатнашабыҙ

Еңеүҙең 80 йыллығы уңайынан "Хәтер баҡсаһы" акцияһында ҡатнашыусылар Бөйөк Ватан һуғышында һәләк булғандар иҫтәлегенә 27 миллион ағас ултыртасаҡ, тип хәбәр иттеләр ойоштороу комитетынан. Акция Рәсәй Президенты ҡушыуы буйынса, “Экологик именлек” милли проектына ярҙам йөҙөнән уҙғарыла.

Акцияға 18 мартта Рәсәйҙең көньяҡ төбәктәрендә, шул иҫәптән Ҡырымда һәм Севастополдә старт бирелә – был көндө Ҡырымдың Рәсәйгә ҡушылыуының йыллығы билдәләнә. Акция 22 июндә, Хәтер һәм ҡайғы көнөндә, Мәскәүҙең Еңеү паркында тамамлана.

Акцияға теләгән һәр кем ҡушыла ала. Бының өсөн сад-памяти.рф сайтының интерактив картаһында үҙ төбәгеңде һайларға һәм яраҡлы урынға теркәлергә кәрәк. Билдәле бер көндә ҡатнашыусыларға үҫентеләр һәм кәрәкле инвентарь тапшырыла. Иҫтәлекле ағасты үҙаллы ла ултыртырға һәм проекттың картаһына яңы урын өҫтәргә мөмкин.

“Хәтер баҡсаһы” акцияһы алтынсы тапҡыр ойошторола. Былтыр Башҡортостан проектта иң әүҙем ҡатнашыусыларҙың береһе булды. Төбәктә 2,2 миллион ағас ултыртылған, һәм был күрһәткес буйынса Башҡортостан Тверь һәм Ырымбур өлкәләренән генә ҡалышып, тәүге өс төбәккә ингән.