Майлы үҫемлектәр майҙаны артасаҡ

Республиканың Ауыл хужалығы министрлығынан хәбәр итеүҙәренсә, Башҡортостандың ҙур май экстракцияһы заводтары ағымдағы йылдың 5 ғинуарынан 30-ына тиклем сит илгә 11,4 мең тонна гранулалы көнбағыш шротын оҙатҡан. Агросәнәғәт комплексы продукцияһын сит илгә һатыуҙы арттырыу “Халыҡ-ара кооперация һәм экспорт” милли проекты маҡсаттарына ярашлы тормошҡа ашырыла.

Ауыл хужалығы малдары һәм ҡош-ҡорт өсөн мал аҙығын әҙерләүҙә ҡулланылған юғары протеинлы өҫтәмә Азербайжан һәм Мароккоға ебәрелгән. Үҫемлек продукцияһы сифат контролен үткән, 161 тимер юл вагонынан һынау лабораторияһында тикшеренеүҙәр комплексы өсөн пробалар алынған. "Россельхознадзор"ҙың Башҡортостандағы идаралығы мәғлүмәттәре буйынса, шрот сит илдәрҙең талаптарына тулыһынса тап килә.

Шрот май биреүсе культуралар орлоғонан үҫемлек майҙарын етештергәндә алынған өҫтәмә продукт булып тора. 2025 йылда Башҡортостанда майлы культураларҙан рекордлы - 1 миллион тоннанан ашыу уңыш йыйып алынған. Ул былтырғыға ҡарағанда 360 мең тоннаға күберәк.

— Майлы үҫемлектәр майҙанын арттырасаҡбыҙ. Сөнки бөгөн аграрийҙарға килем һәм киләсәккә инвестициялау мөмкинлеге биргән төп культураға әүерелә, - тип билдәләне Башҡортостан хөкүмәте вице-премьеры - ауыл хужалығы министры Илшат Фәзрахманов.

Сығанаҡ: Башҡортостан гәзите сайты.