«НЕФАЗ» автобустары етештереүсеһе һөҙөмтәлелекте арттыра

Нефтекамалағы завод 1977 йылдан алып самосвалдар һәм махсус техниканан алып заманса автобустар һәм электробустарға тиклем киң продукция спектрын сығара. Предприятие «КАМАЗ» төркөмөнә инә һәм күп тапҡыр «Башҡортостандың иң яҡшы тауарҙары» һәм «Рәсәйҙең 100 иң яҡшы тауары» конкурстары лауреаты булып тора.

Федераль проектта ҡатнашыу етештереү циклын ҡулайлаштырыуға һәм әҙер продукцияны сығарыу ваҡытын ҡыҫҡартыуға йүнәлтелгән. Проектта ҡатнашыуҙың төп маҡсаты - ҡорамалдарҙы буш тороуҙы кәметеү һәм йыйыу конвейеры эшенең һөҙөмтәлелеген күтәреү.

- «НЕФАЗ» кеүек сәнәғәт гиганты өсөн хеҙмәт етештереүсәнлеген арттырыу илдең технологик суверенитетын нығытыуҙы аңлата. Процестарҙы оптималләштереү юғары технологиялы ҡорамалдарҙы һәм хеҙмәт ресурстарын һөҙөмтәлерәк файҙаланырға, сығымдарҙы ҡыҫҡартырға, эске һәм тышҡы баҙарҙарҙа конкуренцияға һәләтлелекте арттырырға мөмкинлек бирәсәк. Рәсәй машина эшләү тармағы лидерҙары үҙ үҫеше өсөн милли проект ҡоралдарын һайлауына бик шатбыҙ, - тип билдәләне Башҡортостан Республикаһы Хөкүмәте Премьер-министрының беренсе урынбаҫары - иҡтисади үҫеш һәм инвестиция сәйәсәте министры Рөстәм Моратов.

«НЕФАЗ» асыҡ акционерҙар йәмғиәтенең генераль директоры Евгений Корепанов эштең комплекслы, цехтарҙы һәм логистик ағымдарҙы синхронлаштырыу менән алып барыласағын һыҙыҡ өҫтөнә алды. 2025 йылда завод ҡала яны автобустары һәм электробустарының яңы моделдәрен сериялы етештереүгә сығара башланы ла инде.

- Һаҡсыл етештереү ҡоралдары беҙгә яҡшы таныш, әммә Төбәк компетенциялар үҙәге эксперттарының системалы ярҙамы яйға һалынған процестарҙа ла йәшерен резервтарҙы асыҡларға мөмкинлек бирәсәк. Проектта ҡатнашыу пилот участкаһы күрһәткестәрен яҡшыртасаҡ, - тип билдәләне Евгений Корепанов.

Әлеге ваҡытта Үҙәк район комиссияһы эксперттары заводта етештереү процестарын диагностикалауға тотона.

Сығанаҡ: https://economy.bashkortostan.ru/presscenter/news/799719/