Тыуған ауылға спорт

Воркаут комплексын асыу сараһында мәктәп уҡыусылары, уҡытыусылар, ата-әсәләр, ауыл халҡы, район етәкселеге һәм, әлбиттә, проектты ойоштороусылар, уны Әбйәлил районына йүнәлтеүҙә туранан-тура ҡатнашлығы булған мәртәбәле ҡунаҡтар БР Дәүләт Йыйылышы — Ҡоролтай депутаты, «Берҙәм Рәсәй» партияһының «Уңайлы спорт» төбәк проекты координаторы, Өлфәт Мостафин исемендәге спорт әҙерлеге үҙәге директоры Ф. Х. Ғиндуллин, уның урынбаҫары, «Тыуған ауылға спорт» проектының координаторы Е. Ю. Кислицина, «Тыуған ауылға спорт» проекты етәксеһе, «Спартак» физкультура-спорт йәмғиәте советы рәйесе Ф. С. Дәминдаров, проект етәксеһе урынбаҫары, Рәсәй туриндустрия союзының Башҡортостандағы төбәк бүлексәһе етәксеһе К. С. Күскилдин һәм «Урал спорт ҡорамалдары заводы» ЯСЙ-һы генераль директоры урынбаҫары И. М. Нечаев, Башҡортостандың «Волейбол физкультура-спорт федерацияһы» төбәк йәмәғәт ойошмаһының башҡарма директоры С. С. Кирпичников ҡатнашты. 
Рәсәй һәм Башҡортостан байраҡтарын күтәреү хоҡуғы Башҡортостандың атҡаҙанған физкультура хеҙмәткәре, спорт ветераны, балалар-үҫмерҙәр спорт мәктәбенең волейбол буйынса тренеры Сәлим Дәминдаровҡа һәм самбо буйынса республиканың абсолют чемпионы, спорт мастеры кандидаты Рөстәм Рыҫҡоловҡа бирелде. 
Тантанала ҡатнашыусыларҙы Әбйәлил хакимиәте исеменән район баш-лығының беренсе урынбаҫары Р. Ғ. Хәлилов сәләмләне. 

— Тәү ҡарамаҡҡа ғәҙәти спорт майҙансығы булһа ла, бында бик үҙенсәләлекле, хатта республика, ил күләмендә өлгө булырлыҡ, күп кешеләрҙең берҙәм көсө һалынған эш башҡарылды. Таштимер мәктәбенең элекке сығарлыш уҡыусыһы, баш ҡалала йәшәүсе Фуат Дәминдаровтың тыуған ауылы мәнфәғәтендәге башланғысын район хакимиәте, мәктәп, спорт ветерандары, подрядсылар бөтәбеҙ бергә күтәреп алыуыбыҙ һөҙөмтәһендә шәп объект ҡалҡып сыҡты. Был матур үрнәк ҡулында мөмкинлеге булған башҡа яҡташтарға ла тыуған ауылдары, белем алған мәктәптәре өсөн изге эштәр ҡылырға этәргес булыр, тип ышанам. Проектты тормошҡа ашырыуға ҡағылышы булған һәр кемгә рәхмәт белдерәм, — тине ул.
Руслан Ғөзәйер улы спорт майҙансығын артабан камиллаштырыу өсөн мәктәпкә район хакимиәтенән 10 мең һумлыҡ сертификат тапшырҙы. Ә инде  «Тыуған ауылға спорт» проекты сиктәрендә спортты алға этәреүселәр — Ф. Х. Ғиндуллин, С. С. Кирпичников, Ф. С. Дәминдаров (һүрәттә) һәм подряд эштәрен башҡарыусы Р. Р. Ялалов әүҙем эшмәкәрлек һәм халыҡ араһында сәләмәт йәшәү рәүешен пропагандалаған өсөн Рәхмәт хатына лайыҡ булдылар.

Иҫтәлекле матур ваҡиға уңайынан мәктәп уҡыусыларын һәм, ғөмүмән, Әбйәлил, Таштимер ауылдары халҡын Башҡортостан Республикаһы Дәүләт Йыйылышы — Ҡоролтай парламенты һәм депутаттар корпусы исеменән тәбрикләүсе Ф. Х. Ғиндуллин нәҡ ауыл ерендә спортты үҫтереүгә йүнәлтелгән социаль проекттарҙың ғәмәлгә ашырылыуы ҡыуаныслы тине. Әйтергә кәрәк, «Тыуған ауылға спорт» проекты буйынса 5-се комплекс Таштимер мәктәбендә ҡуйылған. Былтыр Йылайыр, Күгәрсен, Бөрйән райондарында, күптән түгел Саҡмағошта ошондай асыҡ һауа аҫтындағы әүҙем физик ял итеү майҙансыҡтары  барлыҡҡа килгән. 
— Спортты яратыусыларға физик шөғөлләнеү өсөн уңайлыҡтар булдырыуға ҙур иғтибар йүнәлтәбеҙ. Уҡыусылар ғына түгел, өлкәндәр ҙә, теләгән һәр кем майҙансыҡҡа рәхим итһендәр. Комплекс ГТО нормативтарын тапшырыу өсөн дә ҡулай, — тине  Фәрит Хөрмәтулла улы.

Ҡоролтай депутаты байрамға буш ҡул менән килмәгәйне: Таштимер мәктәбенә 10 мең һумлыҡ сертификат бирҙе, район башлығы И. Т. Нафиҡовҡа, мәғариф бүлеге начальнигы В. С. Абсаҙыеваға, ДЮСШ тренеры С. Х. Дәминдаровҡа Башҡортостан Республикаһында спортты үҫтереүгә индергән өлөшө һәм әүҙем йәмәғәт эшмәкәрлеге өсөн БР Дәүләт Йыйылышы — Ҡоролтай рәйесе К. Б. Толкачевтың һәм район балалар-үҫмерҙәр спорт мәктәбе директоры  Л. М. Усмановҡа Өлфәт Мостафин исемендәге спорт әҙерлеге үҙәгенең Рәхмәт хаттарын тапшырҙы.
— Үҙем белем алып сыҡҡан мәктәп биләмәһендә заманса спорт майҙансығы асылыуы минең өсөн икеләтә ҡыуаныслы. Халыҡты спортҡа ылыҡтырыу өсөн уны кешеләргә яҡынайтыу зарур. Спорт майҙансығы янынан балалар ҡарап ҡына үтеп китмәйәсәк, һис юғында бер-икене турникта күтәреләсәк. «Тыуған ауылға спорт» проектының төп асылы ошонда ла инде. Беҙҙең район, мәктәп элек-электән спортсылары менән дан тота. Мәҫәлән, Таштимерҙән сыҡҡан Маҙһар Алсынбаев — республикала ғына түгел, Рәсәйҙә билдәле шәхес, уның исемен хәҙер Өфөләге «Биатлон» спорт-һауыҡтырыу комплексы йөрөтә. Әгәр һәр кеше үҙенән һуң изгелектәр ҡалдырырға тырышһа, кесе Ватаны өсөн нимәлер эшләһә — ауылдарыбыҙ сәскә атасаҡ, — тине проект етәксеһе Ф. С. Дәминдаров.
Фуат Сәлим улы, үҙ сиратында, проектты тормошҡа ашырыуҙа булышлыҡ иткәндәре һәм спортты үҫтереүгә һәм пропагандалауға индергән шәхсән өлөштәре өсөн «Спартак» спорт-физкультура йәмғиәте» төбәк йәмәғәт ойошмаһының Почет грамотаһы һәм рәхмәт хаттары менән район башлығы И. Т. Нафиҡовты, Таштимер урта мәктәбе директоры Н. Р. Хәйруллинды, Таштимер ауыл биләмәһе башлығы З. З. Арғынбаевты, спорт ветераны К. Б. Шәрәфетдиновты һәм спорттағы ҙур ҡаҙаныштары өсөн Таштимер урта мәктәбе уҡыусыһы Рөстәм Рыҫҡоловты бүләкләп үтте.
Ауыл халҡы исеменән сығыш яһаусы хеҙмәт ветераны Ф. Х. Иҫәнгилдина август айынан ошо яңылыҡты ишетеп ҡыуанып йәшәүҙәрен, спорт майҙансығын төҙөү буйынса проектта үҙҙәренең  ауыл егетенең инициатор булыуы өсөн ғорурланыуҙарын белдерҙе.
— Фуат Сәлим улы спорт һөйгән педагогтар ғаиләһендә үҫеп буй еткерҙе.  Әле генә ошо мәктәп ихатаһында туп типкән ауылдашыбыҙ район һәм республика етәкселеге ярҙамы менән бөгөн тыуған ауылы өсөн ниндәй ҙур бүләк эшләне. Һәр ваҡыт Фуаттың тыуған ауылы тормошонда ҡатнашлығын тоябыҙ. Төрлө сара, ярыштар ойошторғанда ул бүләктәр менән ярҙам итә, форсаты сыҡҡанда шәхсән үҙе лә ихлас ҡатнаша. Уға ата-әсәйҙәр, олатай-өләсәйҙәр исеменән рәхмәт белдереп, эшендә уңыштар теләйбеҙ, — тине ул.

— Бәхет бер үҙе килмәй. Яңы уҡыу йылын Таштимер урта мәктәбе ике һөйөнөслө ваҡиға менән ҡаршыланы. Беренсеһе — ниһайәт, район хакимәте ярҙамы менән мәктәп алды майҙансығы төҙөкләндерелде, ә икенсеһе — спорт комплексы төҙөлдө. Уның өсөн уҡыусыбыҙ Фуат Дәминдаровҡа сикһеҙ рәхмәтлебеҙ. Майҙансыҡты буш ҡуйып торғоҙмаҫҡа, спорт менән шөғөлләнергә, һаҡсыл мөнәсәбәттә булырға, йәрәхәтләнеүҙәрҙән һаҡланырға һәм яңынан-яңы ҡаҙаныштарыбыҙ менән  ҡыуандырырға һүҙ бирәбеҙ, — тине мәктәп директоры Н. Р. Хәйруллин. Таштимер урта мәктәбе уҡыусылары исеменән бирелгән Рәхмәт хатын Фуат Сәлим улы иң ҡәҙерле бүләк тип  атаны.
Байрам сараһы сиктәрендә Таштимер урта мәктәбенең йәш спортсыларына ГТО нормативтарын уңышлы тапшырған өсөн алтын, көмөш һәм бронза билдәләрен тапшырыу мәле бик иҫтәлекле булды. Спорт өлкәһендә уңыштар ҡаҙанған ҙур ҡунаҡтар алдында бүләкләнеү уларҙы тағы ла бейегерәк еңеүҙәргә сәмләндергәндер, моғайын.
Самбо секцияһында шөғөлләнеүселәр (тренерҙары С. Н. Баһаув, Н. Р. Хәйруллин) күрһәтмә сығыштар яһағандан һуң, спорт комплексын рәсми рәүештә асып, таҫма ҡырҡыу йолаһы үтәлде. Шуны ғына көткән ҡыҙҙар һәм малайҙар кемуҙарҙан гимнастик снарядтарҙа күнекмәләр яһарға, спорт һәләттәрен күрһәтергә ашыҡты. Яңы спорт майҙансығын «ҡотлап», был көндә ДЮСШ тренерҙары ГТО нормативтарын ҡабул итте. Ҡыуаныстан үрле-ҡырлы һикергән, йүгереп түгел, осоп йөрөгән Таштимер уҡыусылары уларҙы һис шикһеҙ «алтын» билдәгә тапшырғандыр тип ышанам. 
Гөлнара КҮСӘРБАЕВА.