Эш йүнәлештәренең береһе - видеокүҙәтеүҙең интеллектуаль системаларын индереү. Был кешеләрҙең һәм уларҙың мөлкәтенең хәүефһеҙлеген тәьмин итеүҙең мөһим өлөшө.
Башҡортостандың Торлаҡ-коммуналь хужалыҡ министры Ирина Голованованың белдереүенсә, 2019 йылдан алып «Башҡорт ихаталары» программаһы буйынса йорт яны биләмәләрендә 2 228 видеокүҙәтеү камераһы ҡуйылған. Шуларҙың 1 307-һе «Хәүефһеҙ ҡала» аппарат-программа комплексына тоташтырылған. Камералар балалар һәм спорт майҙансыҡтарын, парк зоналарын, парковкаларҙы, подъездарға инеү урындарын күҙәтеүгә алыу өсөн ҡуйылған.
Бынан тыш, 1 816 видеокамера «Торлаҡ һәм ҡала мөхите» милли проектының «Уңайлы ҡала мөхитен булдырыу» программаһы сиктәрендә монтажланған. Уларҙың 1 048-е шулай уҡ «Хәүефһеҙ ҡала» комплексына тоташтырылған. Был видеокүҙәтеү системалары, йәмәғәт тәртибен һаҡлауҙа һәм енәйәтселек менән көрәшеүҙә ҙур урын алып тора.