Заманса мәктәп һәм балалар баҡсаһы буласаҡ

Асҡар ауылының «Көнсығыш-1» биҫтәһендә 160 урынлыҡ балалар баҡсаһы менән 640 уҡыусыға иҫәпләнгән дөйөм белем биреү мәктәбе төҙөлә. Яңы учреждение «Демография» милли проекты сиктәрендә сафҡа индерелә.

Район үҙәгендәге 1-се Асҡар урта мәктәбе менән Т. Кусимов исемендәге гимназияла уҡыусылар һаны йылдан-йыл арта. Белем усаҡтарында уҡыу кабинеттары етмәй, сөнки меңдән ашыу уҡыусы иҫәпләнә. Тап шуның өсөн өсөнсө мәктәп төҙөлөшө Асҡарҙа күптән көтөлгән кәрәкле объект.
Көнсығыш-1 биҫтәһенең ҡап уртаһында күҙ асып йомған арала дүрт ҡатлы мәктәп һәм ике ҡатлы балалар баҡсаһы хасил булды. Төҙөлөш эштәре генераль подрядсы — «ОСК» ойошмаһы көсө менән башҡарыла. Проект етәксеһе Нәсим Ғәйдуллин эштәр барышы менән таныштырҙы.

«Беҙ мәғариф тармағын камиллаштырыу маҡсатында артабан да алға барасаҡбыҙ — әлбиттә, эштәр күп әле. Иң мөһим бурыстарҙың береһе — президент программаһы буйынса 31 мәктәпте капиталь ремонтлау, шуларҙың алтауһын 2024 йылда сафҡа индерәсәкбеҙ һәм 25-ен киләһе йылда тамамлайбыҙ. Шулай уҡ быйыл «Мәғариф» милли проекты буйынса төҙөләсәк 9 мең урынлыҡ 8 мәктәпте сафҡа индерергә планлаштырабыҙ», — тип белдерҙе Башҡортостан Республикаһы Башлығы Радий Хәбиров.

Мәктәп менән балалар баҡсаһын берләштергән комплекстың дөйөм төҙөлөш майҙаны 5 мең квадрат метр самаһы тәшкил итә. Бында 160 урынлыҡ балалар баҡсаһы, 640 уҡыусыға иҫәпләнгән урта мәктәп, ҙур спорт залы (550 квадрат метр), хореография залы менән сәнғәт мәктәбе, тамашалар залы төҙөлә.
— Генераль план буйынса балалар баҡсаһында уйындар өсөн резина япмалы 9 майҙансыҡ, 4 ябыҡ веранда буласаҡ. Мәктәпкә килгәндә, төрлө йәштәге уҡыусыларҙың ҡыҙыҡһыныуҙары буйынса майҙансыҡтар айырым эшләнә. Башланғыс класс уҡыусылары өсөн резина япмалы 5 уйын майҙансығы, стадион төҙөләсәк. Йүгереү өсөн юлдар, футбол майҙансығы, төрлө саралар үткәреү өсөн асыҡ майҙансыҡ ҡаралған. Белем усағының физкультура-спорт зонаһы, уҡыу-тәжрибә майҙансығы (баҡса), хужалыҡ зонаһы (газ ҡаҙанлығы), янғынға ҡаршы резервуарҙар, мәктәп һәм балалар баҡсаһының автономлы эше өсөн дизель электр станцияһы буласаҡ, — тип һөйләне Нәсим Хәсән улы. — Бынан тыш, автобус туҡтау өсөн майҙансыҡ, балалар баҡсаһында коляскалар һаҡлау өсөн айырым урын эшләйәсәкбеҙ. Биләмә 3D ҡойма менән уратып алынасаҡ.

Вәсилә Абсаҙиева, район мәғариф бүлеге начальнигы: — Асҡарҙа өсөнсө мәктәп күптән кәрәк. Сөнки район үҙәге үҫә, балалар һаны йылдан-йыл арта. Т. Кусимов исемендәге гимназияла 1250, 1-се Асҡар урта мәктәбендә 1200 уҡыусы белем ала. Ә улар 650 уҡыусыға иҫәпләнгән. Яңы заманса мәктәп Көнсығыш биҫтәһе балалары һәм уларҙың ата-әсәләре өсөн ҙур бүләк буласаҡ. Бында «Демография» милли проекты буйынса балалар баҡсаһы төҙөлә. Музыка мәктәбе лә эшләйәсәк. Мәктәп сафҡа инеү менән уҡыусыларҙы автобуста ташыу еңелләшәсәк. Район үҙәгенең бөтә белем усаҡтарында уҡытыу бер сменала ойоштороласаҡ. Эш сәфәре менән килгәнендә мәктәп вәғәҙә иткән һәм төҙөгән республика Башлығы Радий Хәбировҡа мәғарифҡа иғтибары өсөн ҙур рәхмәт!

Балалар баҡсаһы федераль бюджет аҡсаһына һалына, төҙөлөш тамамланыу өҫтөндә. Мәктәп республика ҡаҙнаһынан финанслана. «Берләшкән төҙөлөш компанияһы» ЯСЙ-һы эшселәре мәктәптең йылытыу, һыу үткәреү һәм электр хужалығын монтажлай, ҡыйығын яба, бер юлы биләмәне төҙөкләндереү эштәрен башҡара.
Төҙөүселәр тырышлығы менән район үҙәгендә заманса, яҡты һәм йылы мәктәп һәм балалар баҡсаһы буласаҡ.
Динара САФИУЛЛИНА.

Читайте нас:

Новости партнеров

Синоптиктарға ышанырғамы, Рәйес бабайғамы?

“Җиде бала үстек әткәй белән...”

О чём говорят немые колонны Уфы

Гәзит Элемтә, мәғлүмәт технологиялары һәм киң коммуникациялар өлкәһендә күҙәтеү буйынса Федераль хеҙмәттең Башҡортостан Республикаһы буйынса идаралығында 2015 йылдың 6 ноябрендә теркәлде. Теркәү номеры ПИ № ТУ 02-01480.

Телефон

8(34772) 2-15-04

Электрон почта

[email protected]

Адресы

453620 Абзелиловский район, с. Аскарово, ул. Ленина, 14а

Реклама хеҙмәте

8(34772) 2-15-55

Редакция

8(34772) 2-04-80, 8(34772) 2-04-83

Ҡабул итеү бүлмәһе

Хеҙмәттәшлек

8(34772) 2-04-80, 8(34772) 2-04-83

Кадрҙар бүлеге

8(34772) 2-11-85