Эштәр графикка ярашлы бара

Ил Президенты Владимир Путиндың ҡабул итеү бүлмәһенә килгән мөрәжәғәттәрҙең береһе Борай районында Тере Танып йылғаһы аша күперҙе ремонтлауға ҡағылған.

     2023 йылдың 7 июнендә М-12 Восток федераль трассаһын төҙөүҙә ҡатнашҡан ауыр йөк машиналары йөрөү сәбәпле күпер емерелә һәм уның аша хәрәкәт тулыһынса ябыла. Шәхси транспорт өсөн «Автодор» компанияһы ваҡытлыса күпер төҙөй, ә пассажир автобустарына урау маршрут буйынса йөрөү ойошторола.

Күперҙе реконструкциялауға аҡса бүленде һәм подряд ойошмаһы менән дәүләт контракты төҙөлдө, тип хәбәр итте ошо көндәрҙә Башҡортостан Башлығы Радий Хәбиров.

- Эштәр графикка ярашлы бара. 2025 йылдың 1 ноябренә ҡоролманың дөйөм төҙөлөш әҙерлеге 23 процент тәшкил итте, – тип билдәләне ул.  Объектты контракт буйынса файҙаланыуға тапшырыу ваҡыты-2026 йылдың 30 ноябре.