Төҙөлөштә һигеҙ айлыҡ күрһәткестәр ниндәй?

Йыл башынан алып Башҡортостанда торлаҡ төҙөү темптары бер аҙ кәмеүен күрһәтә. Росстат мәғлүмәттәре буйынса, ғинуарҙан август аҙағына тиклем республикала 1,37 миллион квадрат метрҙан ашыу торлаҡ майҙаны файҙаланыуға тапшырылған. Былтырғы ошо уҡ осор менән сағыштырғанда, күрһәткес 2,7 процентҡа түбәнерәк.
Шулай ҙа, төбәк Волга буйы федераль округында төҙөлөш күләме буйынса алдынғылар рәтендә ҡала: республика икенсе баҫҡыста тора. Был исемлектә Татарстан 2,8 миллион квадрат метр менән лидерлыҡты бирмәй. Дөйөм алғанда, округ буйынса төҙөлөш эштәре йыллыҡ күрһәткестән 9,6 процентҡа кәмегән.
Дөйөм Рәсәй күләмендә лә ошондай уҡ тенденция күҙәтелә. Ил буйынса һигеҙ айҙа 58 миллион квадрат метрҙан ашыу торлаҡ сафҡа индерелгән, был былтырғыға ҡарағанда 14 процентҡа әҙерәк. Әлегә төҙөлөш майҙандары буйынса Мәскәү өлкәһе, Мәскәү ҡалаһы һәм Краснодар крайы ил буйынса иң юғары күрһәткестәрҙе күрһәтә.