«Динопарк»та ғаиләләр өсөн матур ял

Быйыл байрам сараһын алтын көҙҙөң сыуаҡ көнөндә «Динопарк» ғаилә комплексында үткәрҙеләр, төрлө яҡтарҙан фестивалгә килеүселәрҙе бында эшләүселәр асыҡ йөҙ менән ҡаршы алды. Беҙҙең райондан, шулай уҡ Баймаҡ, Белорет, Йылайыр, Хәйбулла, Ейәнсура райондарынан һәм Сибай, Учалы ҡалаларынан һаулыҡ мөмкинлектәре сикләнгән балалар тәрбиәләгән ғаиләләр, инвалидтар ойошмалары рәйестәре килде.
Фестивалде асыу тантанаһында район хакимиәте башлығының социаль сәйәсәт буйынса урынбаҫары Вадим Ғафаров байрамға килеүсе ғаиләләрҙе тәбрикләп сығыш яһаны.

— Тормош ауырлыҡтарына, яҙмыш ҡаршылыҡтарына ҡарамай көслө һәм әүҙем булыуығыҙ һоҡланыуға лайыҡ. Һеҙ балаларығыҙҙы иғтибар һәм хәстәрлек менән солғап, алға бараһығыҙ, — тине Вадим Фәнил улы. — Бөгөнгө фестивалдән, районыбыҙҙың иң матур төбәгендәге күңелле сәйәхәттән оҙаҡҡа етерлек дәрт-дарман алып ҡайтығыҙ. Һәм ғаиләгеҙ иң көслө, берҙәм команда булыуын онотмағыҙ. Бында килгән һәр ғаилә, һис шикһеҙ, еңеүсе.
Республика инвалидтар ойошмаһы рәйесе Олег Ротов барыһына ла һаулыҡ, ғаилә именлеге теләне һәм йыл һайын был фестивалде юғары кимәлдә үткәргән өсөн район инвалидтар ойошмаһы рәйесе Нәсимә Әҡсәноваға рәхмәт һүҙҙәрен еткерҙе.
Ғаилә комплексы администраторы Валерия Мельникова иһә «Динопарк» етәкселеге исеменән фестивалгә килгән һәр ғаиләгә көтөлмәгән һәм шәп сюрприз әҙерләгәйне. Ул киләһе йылдың йәйенә «Динопарк»та ғаилә менән ял итеүгә 5 мең һумлыҡ сертификат бүләк итте.
Вадим Ғафаров республика инвалидтар ойошмаһы рәйесе Олег Ротовҡа һәм «Динопарк» комплексы директоры Радий Мөлөковҡа оҙайлы хеҙмәттәшлек өсөн район хакимиәтенең рәхмәт хаттарын тапшырҙы.

Район инвалидтар ойошмаһы рәйесе Нәсимә Әҡсәнова фестивалде ойоштороуҙа ярҙам күрһәткән район хакимиәтенә, парк етәкселегенә һәм бағымсыларға рәхмәт белдерҙе, ғаиләләргә яҡшы кәйеф, матур ял теләне.
Ҡунаҡтарға райондың мәҙәниәт бүлеге артистарының моңло күстәнәстәре бик оҡшаны. Фестивалдә ҡатнашыусы Рита Килдейәрова матур йыры менән ҡыуандырҙы. Сибайҙан Ғәйетбаевтар үҙҙәренең музыкаль ғаилә булыуын күрһәтте.
Фестивалдә ҡул эштәре буйынса оҫталыҡ дәрестәре уҙҙы. Әйткәндәй, балалар ижады йорто хеҙмәткәрҙәре бай күргәҙмә ҡуйғайны. Ғаиләләр төрлө материалдарҙан эшләнгән сувенирҙар, картиналар һәм ҡул эштәрен ҡыҙыҡһынып ҡараны. Педагогтар Таңһылыу Юнысова менән Асия Өмөтҡужина макраме һәм пластилиндан һындар әүәләү буйынса оҫталыҡ дәресе үткәрҙе. Улар аңлайышлы һәм еңел итеп өйрәткәндән һуң һәр ғаилә панно үреп ҡараны. Балаларға бигерәк тә пластилиндан композиция эшләү оҡшаны, улар ниндәй генә динозаврҙар әүәләмәне. Күмәкләп башҡарған эштәрен байрам иҫтәлеге итеп алып ҡайттылар.
Матур тәбиғәт ҡосағында саф һауалағы уйындарҙа балалар һәм уларҙың ата-әсәләре әүҙем ҡатнашты. Эшҡыуар Зөлфиә Ғәйнетдинова фестивалдә ҡатнашыусылар өсөн конкурстар, ҡыҙыҡлы уйындар ойошторҙо. Ғаиләләр сәмләнеп ярышты, һәр кем иң шәбе булырға тырышты. Балалар Микки һәм Минни Маус менән бергә рәхәтләнеп бейене, яратҡан йәнһүрәт геройҙары байрамдың йәме булды.
Артабан «Динопарк» хеҙмәткәрҙәре ҡыҙҙар һәм малайҙарҙы аттарҙа һыбай һәм ҡырандастарҙа алып йөрөнө. Балаларға ҙур парк буйлап паровоздарҙа йөрөнөләр. Фестивалгә килеүселәрҙең күбеһе «Динопарк»та тәүге тапҡыр һәм ҙур динозавр, фил, башҡа һындарҙы ҡыҙыҡһынып ҡараны. Балауыҙ фигуралар музейы балалар ғына түгел, өлкәндәрҙә лә онотолмаҫлыҡ тәьҫораттар ҡалдырҙы. Ғаиләләр бында тағы килеп ял итергә һөйләште.

Фестивалдә беҙҙең райондан Аслан Хәмитов һәм Рита Килдейәрова, Баймаҡтан Роберт Низамов, Йылайырҙан Нур Түләшев, Ейәнсуранан Иҙел Ҡолһарин, Хәйбулланан Искәндәр Байғабулов, Белореттан Виолетта Потапова, Сибайҙан Азамат Ғәйетбаев һәм Учалы ҡалаһынан Тимур Кенесарин еңеү яуланы. Уларҙың барыһына ла район хакимиәтенән дипломдар, кубоктар һәм йомшаҡ уйынсыҡтар тапшырылды.
Ҡунаҡтар өсөн «Яҡты-Күл» шифаханаһы кафеһында байрам табыны ойошторолдо, бында ла ғаиләләр шифахана биләмәһе буйлап экскурсия ҡылды һәм сувенир-бүләктәр алды.
Матур тәбиғәт, ҡунаҡсыл хужалар ҡунаҡтарҙа күңелле кисерештәр генә ҡалдырҙы, бөтә ғаиләләр ҙә «Динопарк» комплексына һәм «Яҡты-Күл» шифаханаһына тағы киләсәктәрен әйтеп, фестивалде ойоштороусыларға рәхмәт белдерҙе.
Динара САФИУЛЛИНА.