Глэмпингта ял итеү уңайлы

Амангилде ауылынан Таһир Йәһүҙин ял итеү өсөн үҙенсәлекле глэмпингтар төҙөй. Таһир Тайып улы шәхси хужалығы өсөн федераль грант алыуға өлгәшкән.
Башҡортостанда туризмды үҫтереү концепцияһы сиктәрендә уникаль туробъекттар төҙөү, ҙур ваҡиғалар ойоштороу, эшлекле туризм буйынса системалы эште яйға һалыу, инфраструктура булдырыу, комплекслы турмаршруттар әҙерләү һәм туристик продукттарҙы тышҡы баҙарға сығарыу күҙалланды. Һәм ошо арҡалы дөйөм милли туристик рейтингта Башҡортостан тәүге 10 төбәк иҫәбенә инде. Республика шулай уҡ туристар ағымы күләме, туризм өлкәһендә халыҡҡа түләүле хеҙмәттәр күләме, ҡунаҡханалар, шифаханалар һәм башҡа урынлаштырыу саралары һаны буйынса илдә һәм Волга буйы федераль округында алдынғы урындарҙы биләй.
Мәҡәләбеҙ геройы Таһир Йәһүҙинды ла һәр ваҡыт туристик өлкә йәлеп итә, студент сағында уҡ ул был йүнәлештә эш башлау тураһында уйлана башлай. Әммә юғары уҡыу йортон тамамлау пандемия менән тап килә һәм ул үҙен икенсе өлкәлә һынап ҡарай.

– Ул саҡта уҡ Башҡортостанда, тотош илдә туризмдың ваҡыт үтеү менән популярлашасағы тураһында һиҙемләү бар ине, – ти ул.
Шуға күрә ул был өлкәне өйрәнә башлай, ата-әсәһе һәм туғандары идеялар тәҡдим итә, кәңәштәр бирә. Таһир Тайып улының проекты грант тарафынан хуплана. Ул тормошҡа ашырған проекттың дөйөм күләме 11,9 миллион һум тәшкил итә, шуларҙың 6 миллионы — федераль бюджеттан алынған грант аҡсаһы. Грант аҡсаһына Таһир геокуполдарға заказ бирә.
— Бында йыуыныу, аш-һыу бүлмәләре лә буласаҡ, — тип һөйләне ул. — Миңә хыялымды тормошҡа ашырыуҙа район хакимиәте ҙур ярҙам күрһәтә. Күп мәсьәләләрҙә район хакимиәте башлығының иҡтисад, инвестициялар һәм эшҡыуарлыҡ буйынса урынбаҫары Артур  Дәүләтбаев булышлыҡ итә.
Шуныһы иғтибарға лайыҡ: йәш эшҡыуарҙы һәр ваҡыт экология мәсьәләһе ҡыҙыҡһындыра. Шуға ла уның проекты «ЭкоИл» (экологик ил) исемен алған. Хәҙер уның курорт зонаһындағы эшмәкәрлеге ошо йүнәлештәге туризмды үҫтерәсәк.

Тәбиғәттә иркенләп ял итеү урыны булдырып, бында палаткалар ҡуйырға, усаҡ яғырға кәрәкмәйәсәк. Глэмпингтар уңайлы, туристар карауаттарҙа йоҡлаясаҡтар, уларҙың ялы өсөн барыһы ла бар. Көмбәҙ йылылыҡты яҡшы һаҡлай. Ул тыштан бик ыҡсым һәм йәтеш  күренә, ә ҡунаҡтар эстән дә тәбиғәттең хозур мөйөштәренә, матур урындарына ҡарап һоҡлана ала.
Глэмпингтар көҙгөһөн, октябрь – ноябрь айҙарында асылыр тип көтөлә. Яҡташыбыҙға уңыштар теләйбеҙ!
Гөлфиә НИҒМӘТУЛЛИНА.