Онотолмаҫлыҡ экскурсия

Питомник хеҙмәткәрҙәре ҡунаҡтарҙы йылы ҡаршы алды һәм ҡыҙыҡлы экскурсия үткәрҙе. Бында ҙур, шулай уҡ декоратив тоҡомло эттәр үрсетеү һәм үҫтереү менән шөғөлләнәләр. Балалар кавказ овчаркаһы, тибет мастифтары, япон шпицтары, корги тоҡомло эттәрҙе ҡыҙыҡһынып ҡараны. «Белый лекарь» кинологтары һәр береһе менән таныштырып, улар тураһында һөйләне. Ҡыҙҙар һәм малайҙар эттәрҙең ниндәй командалар үтәүен, нимәләр яратыуын һораштылар, хатта үҙҙәре уларҙы ашатып та ҡараны.
Бында эттәр генә түгел, бесәйҙәр ҙә бар икән. Ҙур мейн-кун бесәйҙәрен тәүгә күргән балалар уларҙың вольерына инеп сыҡты.
Экскурсия аҙағында район инвалидтар ойошмаһы балаларға бүләктәр бирҙе, питомник хеҙмәткәрҙәре уларҙы тәм-том менән һыйланы.
Был экскурсиянан бөтәһе лә бик ҡәнәғәт ҡалды, шатлыҡлы һәм онотолмаҫлыҡ көн өсөн балалар һәм ата-әсәләре питомник етәкселәре һәм хеҙмәткәрҙәренә рәхмәт әйтеп ҡайтты.
Район инвалидтар ойошмаһы рәйесе Нәсимә Әҡсәнова экскурсияға барыу өсөн транспорт менән ярҙам иткәндәре өсөн район хакимиәтенең социаль сәйәсәт бүлегенә һәм мәғариф бүлегенә рәхмәт һүҙҙәрен еткерә.