Балалы ғаиләләрҙе яңы түләү көтә

Рәсәй премьер-министры Михаил Мишустин хөкүмәттең йыллыҡ отчеты ваҡытында яңы түләүҙе иғлан иткән. Ул балалы ғаиләләр йыл һайын 90 мең һум самаһы аҡсаны ҡайтара алыуын әйткән. «2026 йылдың июненән ике һәм унан күберәк балалы эшләүсе ата — әсәләр йыл һайын түләүҙе рәсмиләштерә аласаҡ яңы механизм эшләй башлаясаҡ»,- тип билдәләгән премьер-министр. Йәшәү минимумы — граждандарҙың йәшәүен тәьмин итеү өсөн кәрәкле минималь килем суммаһы. Был күрһәткесте йыл һайын хөкүмәт билдәләй. Рәсәй буйынса 2024 йылда уның күләме уртаса 15 453 һум тәшкил итә. 2025 йылда йәшәү минимумы 17 733-кә тиклем күтәреләсәк. Әммә төрлө төбәктә был сумма төрлөсә. Мишустин әйтеүенсә, бындай түләү күләме ата-әсәләр түләгән НДФЛ-дың яртыһынан ашыуын тәшкил итәсәк. Балалары 18 йәшкә етмәгән (йәки уҡыу йортонда көндөҙгө бүлектә уҡыған 23 йәшкә тиклем) ата-әсәләр уға иҫәп тота ала. Шул уҡ ваҡытта был түләмде алыу башҡа түләүҙәргә йоғонто яһамай.