Башҡортостанда алтын сығарыу өлкәһендә тәртип урынлаштырыу бара

2021 йылдан Башҡортостан Башлығы Радий Хәбиров инициативаһы буйынса ойошторолған ер аҫты байлыҡтарын файҙаланыусылар эшмәкәрлеге мәсьәләләре буйынса ведомство-ара комиссия эшләй. Был механизм тәбиғәтте һаҡлау ҡануниәтен боҙоуға ҡаршы көрәштә үҙенең һөҙөмтәлелеген иҫбатлай. Шулай уҡ мәсьәлә төбәк Башлығының даими контролендә.
Баймаҡ районы башлығы Азамат Иҙрисов «Электрогазета» менән тулыраҡ мәғлүмәт менән уртаҡлашты.
- Беҙҙең районда файҙалы ҡаҙылмалар ятҡылыҡтары бар. «Весна», «Таналыҡ», «Графское» алтын сығарыусылар ЯСЙ-лары ҡырағай ысулдар менән эшмәкәрлек алып бара. Уларҙың эшмәкәрлегенән зыян биш миллиард һумдан ашыу тәшкил итә. Суд процестары алып барыла. Улар тирә-яҡ мөхитте һаҡлау нормаларын үтәмәй, районда теркәлмәй, шуға күрә район бюджетына килем килмәй. Улар ҡаҙыу эштәре үткәргән ерҙәрендә уңдырышлылыҡ ҡайтарыу һәм рекультивация үткәреү тураһында уйланмай. Уларҙың эшмәкәрлеге арҡаһында экологияға зыян килтерелгән, йылғалар, һыу ятҡылыҡтары бысранған, — тип һөйләне Азамат Иҙрисов.
Башҡортостанда ер аҫты байлыҡтарын файҙаланыу мәсьәләләре буйынса ведомство-ара комиссия (МВК) эше бик һөҙөмтәле булды, тип билдәләне район башлығы. МВК инициативаһы һибелгән алтынды контролдән тыш сығарыу процесын туҡтатырға мөмкинлек бирә.
— МВК инициативаһы буйынса «Графское» ЯСЙ-һы административ яуаплылыҡҡа тарттырылды, - тип хәбәр итте Азамат Иҙрисов. - Ә Росприроднадзор Көньяҡ Урал төбәк-ара идаралығы «Башнедра» ға «Графское» ЯСЙ-һының лицензияһын ғәмәлдән сығарыу мәсьәләһен ҡарау үтенесе менән хат ебәрҙе. Был һөҙөмтәлә һибелгән алтынды контролдән тыш сығарыу процесын туҡтатырға һәм үрҙә һанап үтелгән ер аҫты ҡулланыусыларын лицензияларын туҡтатыу менән яуаплылыҡҡа тарттырырға мөмкинлек бирә. Экология министрлығы, хоҡуҡ һаҡлау һәм күҙәтеү органдары менән берлектә законһыҙ табышты туҡтатыу өсөн рейд саралары үткәрелә.
Район башлығы фекеренсә, күп факторҙарҙы иҫәпкә алырға кәрәк. Ер аҫтын эшкәртеү цивилизациялы ысулдар менән алып барылырға тейеш.
— Тәү сиратта, район һәм урындағы халыҡтың мәнфәғәттәрен иҫәпкә алырға кәрәк. Район биләмәһендә юридик шәхесте теркәү, ер аҫты байлыҡтарын файҙаланыусы эшмәкәрлегенә урындағы халыҡты йәлеп итеү, уҡытыу, әҙерләү, тирә-яҡ мөхитте һаҡлау буйынса бөтә нормаларҙы ҡәтғи үтәү зарур, – тип аңлатма бирҙе «Электрогазета» әңгәмәсеһе.
Шулай уҡ ер аҫты байлыҡтарын файҙаланыусыларҙың эшмәкәрлеген һәм үҙ-ара эш итеүен күҙәтеү өсөн йәмәғәт контроле органын булдырыу кәрәклеге лә бар.
–Бындай ихтыяж барҙыр тип уйлайым, - ти Азамат Иҙрисов. - Муниципаль район хакимиәте ер аҫты байлыҡтарын файҙаланыу хоҡуғын рәсмиләштермәйенсә ер аҫты байлыҡтарын файҙаланыу факттарын асыҡлау һәм законһыҙ табыш алыуҙы туҡтатыу маҡсатында халыҡ менән эш итеү практикаһын төҙөнө һәм ҡуллана.
Автор:Дарья Святохина