Дәүләт милли сәйәсәтенең яңы стратегияһы раҫланды

Документ федераль һәм төбәк власть органдарының, урындағы үҙидараның һәм милли сәйәсәт өлкәһендәге башҡа органдарҙың эшен координациялай, уларҙың граждандар йәмғиәте институттары менән үҙ-ара эш итеүен тәьмин итә.

Указ Рәсәйҙә милләт-ара мөнәсәбәттәрҙең хәҙерге торошон тотороҡло тип билдәләй. 2012 йылдан милли сәйәсәтте тормошҡа ашырыу һөҙөмтәле тип таныла: ул сәйәси һәм социаль тотороҡлолоҡто тәьмин итә, күп милләтле халыҡтың берҙәмлеген нығытырға мөмкинлек бирә.

Шуға ҡарамаҫтан, дуҫ булмаған илдәрҙең йәмғиәтте тарҡатыу буйынса эшмәкәрлеге арҡаһында милләт-ара мөнәсәбәттәр өлкәһендәге мәсьәләләр көнүҙәк булып китә. Донъяла русофобияның артыуы менән бәйле проблемалар киҫкенләшә.

Глобалләшеү арҡаһында рухи-әхлаҡи һәм мәҙәни-тарихи ҡиммәттәрҙең юйылыуы милли именлеккә хәүеф тыуҙыра. Шулай уҡ документта миграция фонында барлыҡҡа килгән этник берләшмәләрҙең айырым территорияларҙа күпләп тупланыуы хәүефле тип һанала.

Стратегия йәмғиәттә сепаратистик күренештәрҙе иҫкәртеү, дини һәм милли радикализм таралыуын иҫкәртеү өсөн мәғрифәтселек сараларын үткәреүҙе күҙ уңында тота. Рәсәй мәнфәғәттәренә зыян килтереп, башҡа илдәрҙең мәнфәғәттәрен алға ҡуйыу өсөн милли-мәҙәни өлкәлә коммерцияға ҡарамаған ойошмаларҙы (НКО) ҡулланыу хәүефтең береһе тип атала.

Яңы стратегия неонацизм, русофобия, расизм һәм ксенофобия күренештәренә ҡаршы торорға тейеш. Ул берҙәмлекте, территориаль бөтөнлөктө һәм эске тотороҡлолоҡто һаҡлауға булышлыҡ итәсәк, Шулай уҡ Рәсәйҙең сит илдәрҙә хоҡуҡи дәүләт булараҡ ҡабул ителеүен формалаштырырға ярҙам итәсәк.

Төрлө милләт вәкилдәре араһындағы мөнәсәбәттәрҙе ыңғай баһалаған рәсәйҙәрҙең өлөшө 2036 йылға 85 проценттан кәм булмаҫҡа тейеш, ә дөйөм рәсәй үҙенсәлеге кимәле 95 проценттан кәм булмаҫҡа тейеш. Милли һәм тел билдәләре буйынса дискриминация булмауын граждандарҙың кәм тигәндә 90 проценты билдәләргә тейеш.

Милли сәйәсәт стратегияһында рәсәй милләтенең нигеҙен гражданлыҡ берҙәмлеге күрһәтә. Йәмғиәт рус мәҙәниәтен һәм телен һаҡлауға һәм үҫтереүгә нигеҙләнгән дөйөм мәҙәни кодты берләштерә. Шул уҡ ваҡытта йәштәрҙең сит иле лексикаһын артыҡ ҡулланыуына ҡаршы көрәшеү һәм профессиональ һәм шәхси аралашыу өсөн рус әҙәби телен популярлаштырыу планлаштырыла.

Стратегияны тормошҡа ашырыуҙың көтөлгән һөҙөмтәһе булып рәсәй милләтенең берҙәмлеге һәм милли нигеҙҙәге конфликттар һанының кәмеүе торорға тейеш. Документты тормошҡа ашырыу буйынса сараларҙы Президент Хөкүмәткә билдәләргә ҡушҡан.