Башҡортостанда прокуратура тикшереүенән һуң «Бәләкәй һәм урта эшҡыуарлыҡ» милли проектын тормошҡа ашырғанда мутлашыу тураһында енәйәт эше ҡуҙғатҡан. 2021 йылдың октябрендә Башҡортостандың Бәләкәй һәм урта эшҡыуарлыҡты үҫтереү агентлығы Бәләбәй, Салауат һәм Учалы ҡалаларындағы «Минең бизнесым» офисында проект-монтаж эштәре өсөн подрядсы менән килешеү төҙөгән. Килешеүҙең дөйөм хаҡы 6,7 миллион һум тәшкил иткән. Һөҙөмтәлә заказсы эштәрҙе тулы күләмдә ҡабул иткән һәм түләгән. Һуңынан прокурор тикшереүе килешеү шарттары 720 мең һумға үтәлмәүен асыҡлай. Был енәйәт эше ҡуҙғатыуға сәбәпсе булған да инде.