Ир-уҙамандар хөрмәтләнде

Ватанды һаҡлаусылар көнөнә арнап Рысҡужа ауылы клубында «Ауылымдың тоғро улдары» тип аталған матур кисә үтте. Уны клуб мөдире Фирүзә Хөсәйенова һәм ҡатын-ҡыҙҙар ойошмаһы рәйесе Мәғмүрә Хәсәнова ойошторҙо. Сәхнә түрендәге урын Тыуған илде һаҡлау буйынса изге бурысын намыҫ менән атҡарған ир-азаматтарға бирелде. Улар үҙҙәренең әрме тормошонан иҫтәлектәре менән бүлеште, үҙҙәре менән булған мәҙәк хәлдәрҙе һөйләне. Хәтирәләр концерт номерҙары менән аралаштырылды. Йәштәр, балалар сығыш яһаны. Мәғмүрә Хәсәнова ир-уҙамандарға бүләктәр тапшырҙы. Байрам айҡанлы ауылыбыҙҙың яңы старостаһы Ирәмән Басиров тәбрикләне. Уға тиклем был йәмәғәт бурысын лайыҡлы үтәгән Вәкил Баҡыевтың яҡты рухын бер минутлыҡ тынлыҡ менән иҫкә алдыҡ.

Латифа МОСТАФИНА.

Рысҡужа ауылы.