Уңайлы ваҡытта отпуск кемдәргә тәғәйен?

Өс һәм унан күберәк балаһы булған хеҙмәткәрҙәр өлкән балаһына 18 йәш тулғансы үҙҙәренә уңайлы ваҡытта отпуск алыу хоҡуғына эйә буласаҡ. БР Дәүләт Йыйылышы — Ҡоролтай депутаттары тейешле федераль закон проектын Дәүләт Думаһына тәҡдим итте. «Әлеге ваҡытта күп балалы хеҙмәткәрҙәргә өлкән балаһы 12 йәшкә еткәнсе отпуск алыу өсөн уңайлы ваҡыт һайлау хоҡуғы бирелә, — ти Дәүләт Йыйылышы рәйесе Константин Толкачев. — Ләкин 12 йәштә баланың хоҡуҡи статусы үҙгәрмәй. Ғаилә, бала бәлиғ булғансы, күп балалы тигән статуста ҡала. Был осорҙа ғаиләнең дәүләт билдәләгән хоҡуҡтар һәм ташламалар менән файҙаланыу мөмкинлеге булырға тейеш».