ЯУГИРҘӘРҘӘ — БЕР МАҠСАТ, БЕҘҘЕҢ ИҢДӘ — БАР ХӘСРӘТ

Дүшәмбе көнө район халҡынан сираттағы гуманитар ылау оҙатылды. Гуманитар ярҙамды район хакимиәте башлығының иҡтисад, инвестициялар һәм эшҡыуарлыҡ буйынса урынбаҫары Артур Дәүләтбаев, ауыл хужалығы бүлеге начальнигы Шайморат Нәбиуллин, хәрби-патриотик спорт үҙәге етәксеһе Азамат Амангилдин, Рәсәй Геройы Тамерлан Илһамовтың әсәһе Айгөл Шакирова, ауыл хужалығы бүлегенең баш инженеры Ринат Малыбаев оҙатып йөрөйәсәк. Водителдәр — Рузил Низаметдинов, Рамаҙан Сафиуллин, Фәнис Исрафилов.
Традицияға ярашлы оҙатыу сараһы ярҙам йыйыу урыны Йәштәр йорто алдында уҙҙы. 
— Күптәребеҙҙең яҡындары әле алғы сафта. Аралар алыҫ булыуға ҡарамаҫтан, күңелебеҙ менән беҙ улар янында, ҡулыбыҙҙан килгәнсә ярҙам итергә тырышабыҙ. Район халҡы тарафынан әҙерләнгән әйберҙәр яугирҙәргә барып етһен, ауыр минуттарҙа уларға ярҙам итһен, ризыҡтарына яҙһын. Ә һалдаттарҙы хәстәрләгән ябай халыҡҡа рәхмәттән башҡа әйтер һүҙ юҡ. Яугир-ҙәрҙә дошманды дөмөктөрөү тәүмаҡсат булһа, тылдағыларға яҡташтарыбыҙға бар яҡлап та хәстәрлек күрһәтеү кәрәк. Был беҙҙең мөһим бурыс. Беҙҙең хәҙер бөтә теләк: донъялар тынысланһын, егеттәребеҙ иҫән-һау әйләнеп ҡайтһын, — тине үҙ сығышында район хакимиәтенең беренсе урынбаҫары Руслан Хәлилов.
Ҡатын-ҡыҙҙар яугирҙәребеҙгә 8 мас-кировкалау селтәре үргән. Күңел йылы-ларын, изге доғаларын теләп, 150 пар бирсәткәләр ҙә бәйләгән улар. 
Унан тыш халыҡ ярҙамы менән 3 быс-ҡы, УАЗ машинаһына 8 тәгәрмәс, 8 анти-дрон юрғандар, 2 юрған, 5 йылылыҡ изоляцияһы рулондары, шуруповерт-болгаркалар, балта-сүкештәр, генератор, рация, 30 газ плитәләре, буржуйкалар, 250 бирсәткә, 400 хужалыҡ бирсәткәләре, 30 шапка һәм башҡа көнкүрештә ҡуллана торған әйберҙәр  һатып алынған. 
Аҙыҡ-түлеккә килгәндә, төрлө ауылдарҙан 15 йәшник сәк-сәк, 30 баш ҡорот, 15 килограмм кәнфит, 9 банка ҡайнатма һәм 8 пакет үлән сәйҙәре әҙерләнгән. 
Адреслы посылкалар 45 иҫәпләнә. Был осраҡта, ғәҙәттә, яҡындары һалдаттарға тейешле әйберҙәрҙе үҙҙәре һатып алып ебәрә.
Яңы йыл гуманитар ылауын туплауҙа Ташбулат, Йәнгел, Әлмөхәмәт, Ҡырҙас, Красная Башкирия, Рауил, Таштимер ауыл биләмәләре иң әүҙемдәре булған. 
Красная Башкирия ҡасабаһынан Гөлйөҙөм Сыңғыҙова үҙенең ауылында тегеү цехы булдырған һәм ауыл ҡатын-ҡыҙҙары менән берлектә һалдаттарға тип 25 антидрон юрғандар, 25 ултырғыс түшәктәре, 35 балаклава теккәндәр.
Таштимер ауылының ир-егеттәре был юлы ла тимер мейестәре — «буржуйка»-лар эшләгән. Уларҙы әҙерләүҙә ауылдың старостаһы Дамир Ҡужабаев, Сәғит Вәли-уллин, Фәнис Яҡупов әүҙемлек күрһәт-кәндәр. Ҡатын-ҡыҙҙар иһә маскиров- калау селтәрҙәре үреп, тәмле күстәнәстәр әҙерләгән. Эшҡыуарҙар ҙа ихлас ярҙам иткән. 
— Теләгән һәр кем дөйөм эшкә ҡушыла ала, ауылдаштарҙың күбеһе мөмкин булғанса финанс ярҙам итә. Шулай уҡ эш менән ярҙам итеүселәр ҙә бар, әгәр бер генә кеше лә ихласлығын күрһәтһә, һалдаттарға беҙҙең яҡтан ҙур өлөш индереләсәк. Ауылдаш батыр ир-уҙамандарға күстәнәстәребеҙ барып етер, уларға көс бирер тип ышанабыҙ һәм еңеү менән ҡайтыуҙарын түҙемһеҙлек менән көтәбеҙ, — ти Таштимер ауылының ветерандар советы рәйесе Илүзә Ғәйнуллина.
«Красная Башкирия ауыл хужалығы кооперативы» ЯСЙ-һы етәксеһе Раил Фәхрисламов махсус хәрби операцияла булған яугирҙәргә инселәп ике башмаҡ биргән, уларҙан Ҡушый уңғандары тушенкалар эшләгән. Башмаҡтарҙы Ильяс, Сәғәҙей, Ишдәүләт Һибәтовтар һуйып, итте турап биргәндәр. Ауылдың шәп килендәре һәм ҡыҙҙары Зәйтүнә Сафина, Сания, Илсиә һәм Гөлдәр Һибәтовалар, Мөнирә, Гөлфирә, Әминә Шәрәфетдиновалар, Гөлшат Ишбирҙина иттәрҙе матурлап турап, тәмләткестәр ҡушып, банкаларға тултырып, быҡтыр-ғандар. Шулай итеп, 400 банка быҡтырылған ит яугирҙәребеҙгә ҙур ярҙам буласаҡ.
Ишкилде ауылы ҡатын-ҡыҙҙар советы рәйесе Сәүҙә Шаһивәлиеваның ғаиләһе макарон, ҡарабойҙай, ҡуйыртылған һөт, тәм-том, 8 пар өс бармаҡлы бирсәткә, дымлы салфеткалар тапшырған. Ә фельдшер Нурия Усмано-ваның ғаиләһе 25 таҫтамал ебәргән. Мөс-лимә Мәсәлимова менән өсәүләп изге теләктәр менән бөтәһе лә яратҡан йыуасаны бешереп күстәнәскә һалғандар.
Изге эшкә йәштәрҙең, үҫмерҙәрҙең үҙ өлөшөн индереүе ҡыуандыра. Был юлы «Изгелек ҡыл» ирекмәндәр үҙәгенең эше тулы ҡеүәттә барған, улар антидрон юрғандар эшләүҙә ҡатнашҡан һәм һалдаттарға шәмдәр әҙерләгән. Шулай уҡ Озерный мәктәбенең 9-сы класс уҡыусылары ла гуманитар ылау әҙер-ләүгә ихлас ҡушылған. Улар ауыл мәҙәниәт йортонда шәмдәр эш-ләгән. Шәмдәр эшләү өсөн кәрәкле материал-дарҙы уҡыусыларҙың ата-әсәләре һатып алған. Хәтерегеҙгә төшөрәбеҙ, бөгөн блиндаж шәмдәре яугирҙәргә йылытыу һәм аш-һыу әҙерләү өсөн бик кәрәк.
Йәш быуындың окоп шәмдәре эшләү һәм антидрон юрғандар өсөн материал әҙерләү кеүек изге эштәрҙә ҡатнашыуы юғары кимәлдәге патриотизм һәм социаль яуаплылыҡ тураһында һөйләй. Бындай башланғыстар беҙҙең яугирҙәргә ярҙам итеүҙән тыш, балаларҙа үҙ-ара ярҙам итеү ҡиммәттәрен формалаштыра, ауыр саҡта бер-береңә ярҙам итеү кеүек сифаттарҙы тәрбиәләй. Улар үҙҙәренең хеҙмәте аша Ватанды һаҡлауға нисек өлөш индерә алыуын күрә һәм был әүҙем гражданлыҡ позицияһын формалаштырыу өсөн дә бик мөһим.
«Яҡтыкүл» шифаханаһында кафе директоры булып эшләгән Динара Халиҡова кеүек битараф булмаған кешеләрҙең ҡатнашыуы, хатта бәләкәй генә эштәр аша алғы һыҙыҡта үҙ бурысын үтәгәндәргә шатлыҡ һәм ярҙам килтереү мөмкинлеген күрһәтә. Ул егеттәргә тип Яңы йыл күстәнәстәре әҙерләгән, яугирҙәр өсөн көтөлмәгән сюрприз буласаҡ, уларға яу яланында ла яңғыҙ түгеллектәрен иҫкәртәсәк.
Шулай уҡ Магнитогорск ирекмәндәренең тырышлығын билдәләп үтергә кәрәк, улар «Буран» позывнойлы яугир өсөн кәрәкле әйберҙәр һәм техника йыйыу өсөн берләште. Был берҙәмлек рухының һәм милли именлек тураһында хәстәрлектең ысын өлгөһө. Хәрбиҙәргә ярҙам итеү мөһим һәм бындай башланғыстар башҡаларҙы изге эшкә ҡушылырға саҡыра. 
Гөлфиә НИҒМӘТУЛЛИНА.